Halo 3:ODST玩後感

前言:

Halo 3推出已將近兩年,隨住系列新作 Halo:Reach既發表,Halo 3:ODST可謂fans解喝既間場作品。對於新玩家而言,呢隻野買唔買得過呢?對舊玩家黎講,佢又有乜唔同呢?以下將會分享下我既感覺。

Halo 3:ODST介紹

ODST全名Orbital Drop Shock Troopers,又自稱為地獄傘兵(Hell Jumper),於Halo故事背景中有別於主角 斯巴達戰士,佢地雖然係精銳單位個亦只係血肉之驅,無斯巴達既基因改造、亦無高科技既能量護甲,遊戲中就以呢隻兵種既角度進行遊戲。

ODST仍Halo 3既附加內容,整個遊戲無論圖像引擎、玩法、故事背景都與Halo 3同出一徹。

ODST包含兩張DVD:
第一隻係故事模式,包含一個獨立單元遊戲,及一個名為「槍林彈雨」(FireFight)既模式。
第二隻係Halo 3既連線內容,包含所有之前既收費地圖,簡單黎講你可以用呢一隻碟就玩到所有Halo 3既連線內容。


遊戲內容


單人遊戲

ODST故事背景發生於Halo 2 與Halo 3之間,星盟發覺左地球既位置並進行侵略,一隊ODST正準備向進入大氣層既星盟戰艦進行強登,而你正係呢一行五人隊伍中既新成員-菜鳥 (Rookie)。一切本來進行順利,但正進行登陸時,星盟戰艦突然進行超時空傳送,整隊人亦被捲入去。當你於昏迷中蘇醒後已經係6小時後既事,並身處地 球既新蒙巴薩(如果有留意開故事就知,其實星盟係要係新蒙巴薩挖掘方舟)。

故事以交錯形式進行,首先以菜鳥尋找隊友開始,當發覺線索後就會轉為隊友講述之前發生既事。菜鳥既關卡會較為夜間靜態一d,而隊友既關卡就係日頭槍林彈雨,兩種氣氛交錯進行,感覺就似Halo 2時既對比。

ODST雖然以Halo 3為基礎,但亦成功地帶出新鮮感。因設定關係ODST無Halo 3主角般咁利害,設定細節唔講,主要ODST護甲非常稀薄,使用武器效能比斯巴達低(用SHOT GUN 0距離可以唔破甲..O_o),而且可持彈藥上限比Halo 3少好多,遊戲過程中近戰肉膊成為自殺既做法,相對地距離戰、爆頭、破甲成為最主要既玩法。

遊戲既滅聲手槍、可以zoom既輕機可謂十分切合需要。

對付豹狼、戰豬獸一類最佳做法為手槍爆頭。而對鬼面獸,要先以輕機破甲再補一下手槍爆頭,唔講唔知,星盟既電漿手槍、針刺槍變得十分重要,前者充能下可即破甲,後者可引發爆炸一下KO鬼面獸。總括而言,ODST有別於Halo 3既超人打法,唔可以走入敵人堆中瘋狂掃射。呢一個輕量既改變係槍林彈雨模式中更覺明顯,將會稍後再講

ODST比Halo 3更為人性化一d,對於新玩家而言亦較易受落。場景都係地球為背景,有城市既高樓大廈,有野外, 配合Bungie一向既美術風格,畫面依然可觀。故事以外傳形式進行,即使完全唔知Halo系列都可以投入,雖然遊戲中玩家依然可以拎住枝幾百斤既炮台跳 來跳去,但總比Halo 3既士官長唔會受傷、由幾千呎墮地都絲毫無損黎得有說服力。

總括而言,單人故事對舊玩家都有d驚喜,最唔掂就係最後一關(所有halo game都係咁...),最後一關總係載具逃亡戰,但一d都唔好玩..爛尾,有其他人一齊都好d,如果同AI玩,佢唔會開車,只會做炮手,於是你只可以全 程做司機..zZ。單人遊戲內容好短,normal約5小時可爆,我玩最高難度,兩個人玩約6小時通關。

槍林彈雨模式-這不是給菜鳥的(It's NOT for rookie)
ODST既強力主打絕對係槍林彈雨(FireFight)模式,唔好睇少佢,佢唔係Gears of War2持久戰既翻版,相反,佢係目前同類模式中最出色既。

Firefight共有十個地圖,由故事模式既場景修改而黎,每5波攻勢為1級,共有3級(即15波),每升一級敵人既AI會更具侵略性,比如會更傾向用手榴彈。遊戲中有7條命大家share黎用,過左1級會有2條命回復同相關補給品。

Firefight真正好玩之處於 英雄以上難度。 Firefight 有別於gow2既持久戰,敵人非常有系統,會一隊一隊咁進攻而非散收收亂行。而唔同敵人本身有唔同特性,並非不斷淋子彈落去就得,所以非常講究 1:合作性  2:殺敵技巧 3:戰術

為此,我係度分享小小殺敵心得(無興趣者請直接跳到下part繼續)。

野豬獸:就係手槍爆頭,一槍一隻,唔好浪費其他寶貴子彈。

豹狼:佢地除左狙擊手之外,全部都有盾牌,最佳消滅手法為手槍一下打腳,佢地會成個彈起,呢個時候再一槍爆頭,兩發手槍子彈一隻,唔洗浪費。

鬼面獸(藍甲):鬼面獸有護甲,要先破甲再打肉身先死,唔好用手槍爆頭,你射成排都唔爆,下策可用輕機掃,但較好辦法為執地上(野豬獸掉好多比你執)既電 漿手槍,充能後一發就可以破甲,再補一發手槍爆頭(唔好天真地用肉膊,你批佢兩下先死,佢鎚你一下,附近又有d卒仔抽下你水你就會88),KO之後先轉返 輕機,另外針刺槍用2/3 排可以引發爆炸即殺一隻。

鬼面獸(金甲):呢種係隊長,除左甲厚d之外,佢地仲會反彈黏貼手榴彈(你自己食返),十分難搞,除左唔好浪費黏彈外,殺敵方法如上。

鬼面戰(隱形):可用夜視模式睇到,但抵死之處為地圖多數係白天,另外佢地一出場就會掉閃光彈@@.."轉句說話一見閃彈代表佢地出場,佢地最大殺傷力為 燃燒手榴彈(hi一hi d火你都死),佢地仲手持shot gun陰你,所以唔好咁傻仔走去批佢兩下,分分鐘比佢shot死。殺死佢地後既燃燒手榴彈十分有用,因為可以黏住d勁野係咁燒,記得keep好佢。

鬼面獸(重力鎚):呢隻係尾局會出兩隻,非常頭痛,佢地d無雙鎚,一下就炸到你99里遠,你比佢埋到身就簡定個靚方向比佢送你機好過,佢地仲有超屆機既無 敵道具,一開左全身白光,刀槍不入。最佳殺法為一開局拿拿臨mark實佢地個位,睇睇地下有無針刺槍,一排子彈就可以破佢甲(要準,不然佢會開無敵道 具),要注意佢就算破甲都唔會甩,依然成身重裝,而且佢地唔怕黏彈同針刺爆炸,用針刺破甲後即轉手槍爆頭就可以快捷ko佢。之後佢地既重力鎚就歸你慢慢玩

獵人:呢隻又係一對對咁出現,除左頸部同後腰橙色肉外,其他地方打唔入(用重形武器除外)。千萬唔好比兩隻同時合流,不然會打得好辛苦。先合力殺一隻,一個做引,其他打佢後腰,當然一發準確既電漿手榴彈黏貼腰部就最有效(有重力鎚或燃燒彈就輕鬆好多)。

兵蜂:會一大群十幾隻出,爆頭一槍一隻,佢地傾向近身圍住你轉,有機會就用肉膊可節省唔少時間。
.
.
.

總之FireFight非常要求合作及對敵人既殺敵技巧,一行四個人玩非常過癮,而且唔同地圖變化亦多,除左日間亦有夜景場,有戴具場等等,但最另人失望之處為唔可以於live自己搜尋場次(無matchmaking)只限好友名單中互相邀請,玩起上黎都幾唔方便。

=========================
總結

ODST只有5小時既單人故事,而Firefight mode則係成隻game既主打部份。雖然ODST無專屬既連線mode,但第二隻光碟包含所有Halo 3連線對戰內容,可以彌補不足。

以附加內容黎講ODST的確貴,包含Halo 3 連線內容可以另佢較為合理,但對於唔鐘意玩Halo 3 online既玩家而言成為雞肋。但無論如何,以單機質素同firefight mode黎講,已經足夠另呢個附加內容合格有餘。


+單人模式有新鮮感
+音樂非常出色、配音亦好
+場景風格靚(對於愛好Halo風格而言)
+ Firefight mode會另唔鐘意halo 3既人愛上
+提供所有halo 3既連線內容

-單人模式短
-整個遊戲內容唔夠,對於唔玩halo 3 online玩家來說,除左單人故事外,重玩價值唔值$299
-Firefight mode另無朋友玩halo既人唔方便


=Halo 3 online需要玩家模索並非如CoD、GoW一類易上手,firefight mode係一個較易入口既學習途徑
=有意接觸Halo系列既新玩家可以由此作為出發點
=對Halo 無愛人士此作唔會另你挖目相看,但firefight mode的確好玩,視乎你願唔願意比咁多錢玩一個mode。


8.5/10分

linjie 發表在 痞客邦 PIXNET 留言(0) 人氣()